فرض کریں کسی ریستوران میں چار احباب بیٹھے رات کا کھانا کھا رہے ہیں۔پہلا دوست بھنے ہوئے گوشت کا مزہ لے رہا ہے، دوسرا سبزی خور ہے سو وہ پالک پنیر سے کام چلا رہا ہے، تیسرے نے سگریٹ سلگایا ہوا ہے اور وہ شراب کے ساتھ تلی ہوئی مچھلی کھارہا ہے جبکہ چوتھا سگریٹ کو نفرت سے دیکھ رہا ہے مگرشراب اُس نے سب سے زیادہ چڑھارکھی ہے۔کوئی بھی دیکھنے والا بتا سکتا ہے کہ اِن چاروں افراد نےاپنے اپنے مذہبی احکامات کے تابع کھانے پینے کی ترجیحات طے کررکھی ہیں ۔لیکن یہاں سوال یہ پیدا ہوتا ہے کہ کیا مذہبی احکامات کی بجاآواری شخصی عقیدے کے تحت فقط اپنی ذات تک محدود ہوتی ہے یا پھر مذہبی احکامات ،مطلق اور ابدی اخلاقی ضابطہ کار (Moral Code) کا واحد ذریعہ ہوتے ہیں جنکے نفاذ سے ہی ایک اعلیٰ انسانی معاشرہ وجود میں آسکتا ہے؟ تاریخ کا معمولی طالب علم بھی جانتاہے کہ اچھائی اور برائی کے پیمانے وقت کے ساتھ ہمیشہ بدلتے رہے ہیں اور یہ تبدیلی انسانی شعور کی ترقی، ارتقا اور معاشی سبب کے باعث ہوتی رہی ہے۔انسان کی دس ہزار سال کی تاریخ چھاننے کی ضرورت نہیں ، آج سےفقط سو سال ہی پیچھے چلے جائیں تو پتا چلے گا کہ جس مذہبی ضابطہ کار کی رُو سے عورتوں کا گھر سے باہر نکلنا غلط تھاآج اسی ضابطہ کار کے ترجمان عورتوں کے کام کرنے کے فضائل بیان کرنے میں لگے ہیں۔ برٹرینڈ رسل اخلاقیات سے متعلق اپنے مضمون میں لکھتے ہیں :’’ایک اچھا آدمی وہ ہے جو اپنے قرابت داروں اور دوستوں کی خوشی کا احساس کرے اور اگر ممکن ہو تو بنی نوع انسان کا بھی اور اگر وہ فنون لطیفہ اور سائنس کا بھی دلدادہ ہو تو کیا کہنے!یہ بات اہم نہیں ہے کہ وہ آدمی اُن اخلاقی اصولوں کی تابعداری کرتا ہے یا نہیں جو یہودیوں نے ہزاروں برس پہلے لکھے تھے کیونکہ عین ممکن ہے کہ کوئی آدمی اُن تمام اصولوں کی پاسداری کرنے کے باوجود برا ہی رہے!‘‘اہل مذہب کو مگریہ تاویل پسند نہیں آتی کیونکہ اُنکے خیال میں مذہب انسان میں جو اخلاقی حِس بیدار کرتا ہے وہ عقل سے نہیں آسکتی۔میرے پسندیدہ اور صاحبِ طرز کالم نگار خورشید........

© Daily Jang