سکیورٹی فورسز نے خیبرپختونخوا میں دو مختلف کارروائیوں میں 11 دہشتگرد ہلاک کر دئیے ہیں۔پاک فوج کے شعبہ تعلقات عامہ کی جانب سے جاری بیان کے مطابق خیبرپختونخوا میں سیکیورٹی فورسز نے 2 مختلف آپریشن کیے، انٹیلی جنس کی بنیاد پر ایک آپریشن شمالی وزیرستان میں کیا گیا جہاں ایک دہشت گرد مارا گیا۔ترجمان پاک فوج کے مطابق دوسرا آپریشن ڈیرہ اسماعیل میں کیا گیا جہاں 10 دہشت گردوں کو ہلاک کیا گیا۔اس میں کوئی دو رائے نہیں کہ ڈیرہ اسماعیل خان میں دہشت گردوں اور سمگلروں کا گٹھ جوڑ ہے ،جس نے محکمہ ایکسائز اور کسمٹز کے کئی ملازمین کو شہید کیا ہے ،جس کے بعد قانون نافذ کرنے والے اداروں نے آپریشن کر کے دہشت گردوں کو کیفر کردار تک پہنچایا ہے ۔آئی ایس پی آر نے بتایا کہ مارے گئے دہشت گرد سیکیورٹی فورسز کے خلاف دہشت گردی کی متعدد کارروائیوں اور معصوم شہریوں کی ٹارگٹ کلنگ میں سرگرم رہے۔سکیورٹی فورسز نے پشین کے سنزلہ پہاڑ میں دہشت گردوں کے خلاف آپریشن کے دوران لیویز اہلکار کو شہید کرنے والے دو دہشت گرد بھی ہلاک کر دیئے۔ان دہشت گردوں کی ہلاکت کے بعد ان کے سہولت کاروں کے خلاف بھی آپریشن کیا جائے کیونکہ جب تک دہشت گردوں کے سہولت کاروں اور فنانسرز کے خلاف کارروائیاں نہیں کی جاتیں تب تک ڈیرہ اسماعیل خاں میں امن قائم کرنا مشکل ہی نہیں ناممکن ہو گا ۔ اس کے علاوہ سمگلروں کے خلاف بھی کارروائیاں کی جائیں تاکہ غیر قانونی نقل و حرکت کو روکا جا سکے ۔