پنجاب میں آٹا 145 سے 150 روپے کلو کے بیچ بک رہا ہے اور خاموش عوام خاموش دہائیاں دینے کے سوا کچھ نہیں کر سکتے۔ جہاں چیخ و پکار والی دہائی کوئی نہ سنتا ہو، وہاں خاموش دہائی کون سنے گا۔ سندھ سرکار رعایتی نرخوں پر پنجاب سے آدھی قیمت پر آٹا دے رہی ہے لیکن اس کے اس اقدام کو ’محب وطن ‘ حلقوں نے مسترد کر دیا ہے، یہ کہہ کر کہ سندھ حکومت نے بلدیاتی الیکشن میں ووٹ لینا ہیں اس لیے اس نے یہ غیر مناسب اقدام کیا ہے جبکہ پنجاب حکومت نے اعتماد کا ووٹ جیتنا ہے اور اعتماد کے ووٹ میں سستے آٹے کا کوئی کردار نہیں ہو سکتا چنانچہ یہاں جس بھائو بک رہا ہے، عوام کو اسی بھائو خریدنا ہو گا بلکہ ابھی خرید لیں تو اچھا ہے آنے والے دنوں میں دو سو کا بھی ہو سکتا ہے۔ اعتماد کے ووٹ سے یاد آیا کہ بنا خواب دیکھے سیاسی پیش گوئیاں کرنے والے حافظ حمد اللہ نے کہا ہے کہ پرویز الٰہی اعتماد کا ووٹ لے لیں یا نہ لے سکیں، دونوں صورتوں میں وہ وزیر اعلیٰ نہیں رہیں گے۔ یہ تو اور بھی پنجاب حکومت کی پالیسی درست نکلی یعنی جب وزیر اعلیٰ رہنا ہی نہیں ہے تو سستا آٹا دینے کا گناہ بے لذت کیوں کریں؟ جو ’ثوابِ دارین‘ فی یوم کے حساب سے کما رہے ہیں، وہ کماتے رہیں جب تک کما سکتے ہیں، کل کس نے دیکھا۔ سنا ہے ایک اٹھتی جوانی نے ثوابِ دارین کمانے کے ریکارڈ قائم کر دیے ہیں۔ سابق ’چیف‘ نے ایک مشہور کالم نویس کو بتایا جو اس نے اپنے کالم میں لکھ بھی دیا، پروگرام میں نشر بھی کر دیا کہ پنجاب کے خزانے میں گزشتہ جولائی میں 500 ارب اضافی پڑے تھے، جولائی میں اٹھتی جوانیوں کی حکومت آئی اور یہ 500 ارب روپے دو اڑھائی مہینوں میں لاپتا ہو گئے۔ کہاں گئے ہوں گے؟ اٹھتی جوانیوں کے کھاتوں کی طرف اشارہ واضح ہے لیکن کوئی ذکر نہیں کرتا۔