ماڈل ٹاؤن لاہور میں مسلم لیگ(ن) کی مرکزی قیادت کے اجلاس مسلسل جاری ہیں اور قائد مسلم لیگ(ن) اپنے خیالات کا اظہار کرتے ہیں ان کا مرکزی موقف تو اپنے دور کی ترقی اور حالیہ حالات کے موازنے سے متعلق ہے تاہم درمیان میں وہ یہ سوال بھی اٹھا دیتے ہیں کہ ان کو غیر قانونی اور غیر اخلاقی طورپر وزارت عظمیٰ سے نکالا گیا اور پاکستان کی ترقی کو بریک لگا دیئے گئے۔گزشتہ روز انہوں نے مہنگائی کا بھی ذکر کیا اور کہا کہ لوگ اب آٹا اور سبزی خریدنے سے بھی معذور ہیں۔ان کا کہنا تھا کہ اب اگر اقتدار ملا تو وہ پہلے سے بھی زیادہ محنت اور توجہ سے عوام اور پاکستان کی خدمت کریں گے۔ یہ اجلاس آئندہ عام انتخابات میں امیدواروں کے تعین کے لئے ہو رہے ہیں اور ہر روز کسی ایک ڈویژن کے امیدواروں کو بلایا جاتا ہے۔ سابق وزیراعظم کا کہنا ہے کہ ٹکٹ میرٹ کی بنیاد پر جیتنے والوں کو دیئے جائیں گے۔