تاریخ نویسی اور تحقیق نگاری میں رسائل و جرائد بنیادی مآخذ کا درجہ رکھتے ہیں۔ ”تحقیق نام ہے حقائق کی تلاش اور دریافت کا“، جبکہ رسائل اپنے سماج کے بدلتے رجحانات اور نظریات کے آئینہ دار ہوتے ہیں۔فروغِ علم و ادب میں جرائد و رسائل کا کردار ہر دور میں اہم رہا ہے۔ ہر زمانے کا تخلیق کار عصری دور میں موجود خوبیوں یا خامیوں کی بھرپور عکاسی کے ساتھ ساتھ معاشرے کی تعمیر وترقی کے لئے اپنی تخلیقی صلاحیتوں کو بروئے کار لاتا ہے۔

رسائل و جرائد میں متنوع موضوعات پر مختلف قلم کاروں کی اپنے اپنے خاص اسلوب میں شائع شدہ نگارشات قارئین اور محققین کے لئے زیادہ دلچسپی کا باعث بنتی ہیں۔کتاب عموماً یک موضوعی ہوتی ہے، لیکن رسائل کے مشمولات میں مختلف موضوعات کے علاوہ ایک موضوع پر کئی مصنّفین کی تحریروں سے اس سے متعلق تمام پہلو سامنے آ جاتے ہیں۔اسی طرح رسالوں کی خصوصی اشاعتیں اور کسی موضوع یا شخصیت پر خاص نمبر نہایت اہمیت کے حامل ہوتے ہیں۔

برصغیر پاک و ہند سے گزشتہ تقریباً دو صدیوں سے شائع ہونے والے لاتعداد رسائل و جرائد اپنے دور کی سیاسی، سماجی، لسانی، مذہبی و تہذیبی تاریخ اپنے اندر سمیٹے ہوئے ہیں۔ ان رسالوں میں نامور محققین، مصنّفین کے ان گنت علمی، تحقیقی، ادبی، تاریخی، مضامین و مقالات تک رسائی مشکل ترین بلکہ ناممکن کے قریب کام ہے۔ نادر و نایاب رسائل کی کھوج پھر ان کی فائلوں سے متعلقہ شمارے کی تلاش آسان کام نہیں ہوتا بلکہ طویل عرصے کی جستجو کے باوجود مطلوبہ مواد نہیں........

© Daily Pakistan (Urdu)