محکمہ موسمیات اور ماحولیات کی اطلاع کے مطابق آج (بدھ) بھی سموگ میں کوئی کمی نہیں ہوئی اور مجموعی طور پر لاہور میں ہوا کی آلودگی والی شرح چار سو سے زیادہ رہی اور لاہور پھر سے دنیا کا پہلا شہر ہوا جو آلودگی کے حوالے سے ہے۔ نگران صوبائی حکومت نے اس پر قابو پانے کے لئے بہت کچھ کیا، کئی بار سمارٹ لاک ڈاؤن ہوا، تعلیمی ادارے ہفتے میں تین روز بند رکھے گئے اس کے باوجود سموگ پر قابو نہیں پایا جا سکا، اسی حوالے سے نگران حکومت نے لاہور میں مصنوعی بارش کا فیصلہ کیا جو چینی ماہرین کے تعاون سے برسے گی اور اس سے کمی ہو سکے گی کہ محکمہ موسمیات کے مطابق قدرتی بارش کا امکان نہیں۔

سائنس علم اور حقیقت ہے اسے تسلیم نہ کرنا ویسے ہی ہے جیسے مادہ پرست اللہ کے وجود سے منکر ہو جاتے ہیں تاہم ہم جومسلمان کہلاتے ہیں ہم ہر دو پر یقین رکھتے ہیں،سائنس اگر علم ہے تو دین اللہ کی دین،اسلام کی تعلیمات اس کی ہیں جو پیغمبر آخر الزمان حضرت محمد مصطفےٰﷺ کے توسط سے ہمیں ودیعت کی گئیں۔ اب یہ الگ سوال ہے کہ ہم ان تعلیمات پر کس حد تک عمل پیرا ہیں، اگر ہماری توجہ دین کی طرف ہو تو قرآن مقدس میں غور کرنا لازم ہے اور جو لوگ ایسا کرتے وہ فلاح بھی پاتے ہیں اور ان کو بخوبی معلوم ہے کہ اللہ ہی بارش برسائے گا اور موسموں کے تغیر و تبدل کا اختیار بھی وہی رکھتے ہیں۔ یہ درست کہ آج جس پریشانی سے ہم گزر رہے ہیں،یہ خود اپنے ہاتھوں سے لائی ہوئی ہے اس میں کچھ لاعلمی، جہالت اور باقی سب سائنس کی ترقی کا حصہ ہے اور اسی سائنس ہی نے یہ سب بتایا بھی ہے اور اب ہم مادہ پرستی کے اسی ماحول میں اسی علم کے ذریعے اس پر قابو بھی پانا چاہتے ہیں، جو نہیں ہو رہا۔