اسرائیل کےمغربی سرپرستوں امریکہ، برطانیہ اور فرانس وغیرہ کے بے تحاشا اسلحہ اور عملی مدد سے نہتے فلسطینیوں کے قتل عام اور نسل کشی کا ساتواں مہینہ شروع ہوگیا ہے۔ اس دوران اب تک 33 ہزار سے زائد فلسطینی مرد، عورتیں اور معصوم بچے شہید ہوچکے ہیں جبکہ 76 ہزار شدید زخمی اور دس ہزار لاپتہ ہیں جن کے بارے میں خیال کیا جاتا ہے کہ وہ اسرائیلی طیاروں کی اندھا دھند بمباری سے تباہ ہونے والے مکانات، ہسپتالوں اور دیگر عمارتوں کے ملبے تلے دبے ہوئے ہیں ان کے زندہ ہونے کی کوئی امید باقی نہیں۔ لاکھوں افراد بے گھر اور صیہونی رکاوٹوں کے باعث بین الاقوامی امداد نہ پہنچنے کی وجہ سے فاقہ کشی کا شکار اور موت کے خطرے سے دوچار ہیں۔ دنیا بھر میں صیہونی فوج کے انسانیت کش حملوں کے خلاف مسلسل احتجاج، جنگ بندی کے حق میں اقوام متحدہ کی قراردادوں، اسرائیل کو اسلحہ کی فراہمی روکنے کے لئے انسانی حقوق کونسل کے مطالبے، امریکی صدر کی طرف سے اسرائیل نواز پالیسی پر نظر ثانی کے اشارے اور خود اسرائیل کے اندر شدید مخالفانہ مظاہروں کے بعد وزیراعظم نیتن یاہو نے جنوبی غزہ سے اپنی فوج کا کچھ حصہ واپس بنانے کا اعلان کیا ہے لیکن ساتھ ہی یہ بھی بتادیا گیا ہے کہ اس اقدام کا مقصد جنگ کے اگلے مرحلے کی تیاری کرنا ہے۔ تاہم ایک مثبت خبر یہ ہے کہ قاہرہ میں مصر، قطر اور امریکہ کی ثالثی میں جنگ بندی مذاکرات شروع ہوگئے ہیں جن میں شرکت کے لئے اسرائیل اور فلسطینی تحریک مزاحمت حماس کے وفد پہنچ چکے ہیں۔ مذاکرات کے نتیجے میں عیدالفطر سے غزہ میں جنگ بند ہوسکتی ہے لیکن........

© Daily Jang