اردو شاعری میں محبوب کا وہی مقام ہے جو کسی سیاسی پارٹی میں بانی جماعت کا، اُس مقام تک کوئی نہیں پہنچ سکتا،اُس کے ایک اشارہ ابرو پر عاشقوں کی فوج اور جاں نثاروں کی جماعت کَٹ مرنے کو تیار رہتی ہے۔محبوب کی ناز و ادا اور عِشوہ گری کے سامنے کسی کا بس نہیں چلتا، عُشاق اُس پر جان چھڑکتے ہیں اور محبوب کا قُرب حاصل کرنے کیلئے دیوانہ وار پھرتے ہیں۔ محبوب چاہے تو عاشق کو اپنے دیدار سے فیض یاب کردے اور چاہے تو اُس سے نظریں پھیر لے، محبوب سے پُرس نہیں کی جا سکتی ،محبوب پر کوئی قانون لاگو نہیں ہوتا،وہ جتنے مرضی یو ٹرن لے اسے کوئی غلط نہیں کہہ سکتا ، وہ چاہے تو رقیب کے ساتھ مے پیے اور چاہے تو نامہ بر کےساتھ فلرٹ کرے، کسی عاشق کی مجال نہیں کہ اُس کو کٹہرے میں کھڑا کرکے پوچھے کہ تمہارا نظریہ عشق کیا ہے، اگر جلوت میں رقیب کو برا بھلا کہتے ہو تو خلوت میںنامہ برکو مذاکرات کا پیغام کیوں دیتے ہو؟ غالب کہیں کہیں موقع پا کر اُس سےسوال کر لیتا ہے مگر اِس انداز میں کہ محبوب کو برا نہ لگے۔ملاحظہ ہو:’’میں مضطرِب ہوں وصل میں خوفِ رقیب سے...ڈالا ہے تم کو وہم نے کس پیچ و تاب میں ۔‘‘یعنی میں تو اِس لیے مضطرِب ہوں کہ کہیں ہماری ملاقات کے دوران رقیب نہ آجائے مگر اے محبوب تم کیوں فکر مند ہو، کیا تمہارے دل میں بھی چور ہے ؟یوں لگتا ہے جیسے غالب نے یہ شعر ایوان ِصدر میں بیٹھ کر کہا تھا!

اردو شاعری کا دوسرا دلچسپ کردار عاشق ہے، پاکستانی ووٹر کی طرح اِس بیچارے کی بھی کوئی زندگی نہیں، اِس کے صرف فرائض ہیں حقوق نہیں ۔ یہ محبوب پر منحصر ہے کہ کبھی کبھار اُس پر ترس کھا کر اپنی محفل میں بلا لے اور وہاں بھی عاشق کے ساتھ بیٹھنے کی بجائے غیر کے ساتھ چہلیں کرتا رہے۔یہ عاشق کی ڈیوٹی ہے کہ وہ محبوب کو ہمہ وقت اپنی وفاداری کا یقین دلاتا رہے،اُس کے حسن و پیراہن کی تعریف کرے، گاہےگاہے محبوب کو خط لکھے اورآشفتہ سری میں اُس کے گلی کوچے کا طواف کرتا رہے۔’’وائے دیوانگی ِ شوق کہ ہر دم مجھ کو...آپ جانا........

© Daily Jang