”پختون بیلٹ کی یہ بدقسمتی رہی ہے کہ وہ گزشتہ چالیس سال سے لیبارٹری کی صورت اختیار کرگئی ہے۔ عالمی اسٹیبلشمنٹ نے بھی اپنی جنگوں اور تجربات کیلئے اس خطے کو میدان بنایا اور ملکی اسٹیبلشمنٹ نے بھی۔ مجھے اس حوالے سے دیگر ملکی صحافیوں کی نسبت یہ سبقت حاصل رہی کہ میں ان بے چہرہ جنگوں کا حصہ بھی رہا، اس کے متاثرین میں بھی شامل رہا اور بطور صحافی انکا مشاہدہ اور تجزیہ کرنے والا بھی رہا اور ”ڈرٹی وار“ کی صورت میں ان مشاہدات کو سپرد قلم کرچکا ہوں۔ یوں تو اس لیبارٹری میں ان منحوس تجربات کا یہ سلسلہ گزشتہ چالیس سال سے جاری ہے لیکن میری کتاب ”ڈرٹی وار“ میں صرف بیس سال یعنی 2001 سے 2023تک کے واقعات کا احاطہ کیا گیا ہے۔ یہ اس بیس سالہ ہمہ پہلو جنگ کی روداد بھی ہے، اور ہر موڑ سے متعلق میرا تجزیہ اور اس وقت اس کے حل کے حساب سے میری تجاویز بھی ہیں۔

جو جنگ پختون بیلٹ میں وار آن ٹیرر کے نام پر لڑی گئی، اس کا صرف ایک پہلو یعنی ستر اسی ہزار انسانوں کا لقمہ اجل بن جانا دنیا کے سامنے ہے لیکن حقیقت یہ ہے کہ اس جنگ سے پورے پاکستان اور بالخصوص پختون بیلٹ کے باسی کئی حوالوں سے متاثر ہوئے ہیں۔ اس جنگ نے انکی معیشت کو تباہ کرکے رکھ دیا۔سیاست اور اس کے کردار بری طرح متاثر کئے۔ انکے ادب اور شاعری کو غیرمعمولی حد تک متاثر کیا ۔ انکی تہذیب اور ثقافت اور سماجی رویوں کو الٹ پلٹ کے رکھ دیا ۔لیکن دنیا اور باقی اہل پاکستان ان پہلوئوں سے بے خبر یا لاتعلق رہے ۔ یہ گندی اور زندگی کے ہر شعبے کو متاثر کرنے والی جنگ اگر دنیا کے کسی اور ملک میں لڑی گئی ہوتی تو اب تک اس پر سینکڑوں فلمیں بن چکی ہوتیں اور ہزاروں کتابیں لکھی جاچکی ہوتیں یا پھر جگہ جگہ اس کے میوزیم بنے ہوتے (میں کئی سال سے یہ تجویز دے رہا ہوں کہ فضول کاموں کیلئے استعمال ہونے والے انگریز دور کے بنائے ہوئے وسیع و عریض گورنر ہائوس کو وار آن ٹیرر کے میوزیم کے طور پر استعمال کیا جائے ) لیکن افسوس اس حوالے سے پاکستان میں جو کچھ لکھا اور کہا گیا وہ نہ ہونے کے برابر ہے۔ جو کچھ لکھا بھی گیا ہے وہ مغربی مصنفین نے لکھا ہے جبکہ ہمارے اپنے لوگوں کی کتابیں یا دستاویزی فلمیں........

© Daily Jang