سوویت یونین کے ٹوٹ جانے اور کمیونزم کی شکست کے بعد دنیا میں امریکہ اور اس کے اتحادیوں کی تنہااجارہ داری قائم ہوئی اور نیو ورلڈ آرڈر وجود میں آیا۔ اس نیو ورلڈ آرڈر میں امریکہ کو من مانیوں کا بھرپور موقع ملا۔ جب چاہا عراق پر چڑھائی کی، جب جی میں آیا افغانستان میں جاگھسا اور جب دل کیا مصر جیسے ممالک میں اپنی مرضی کی حکومتیں قائم کیں لیکن اب ایک بار پھر وہ وقت آ گیا ہے کہ دنیا یونی پولر (ایک طاقت کی اجارہ داری) سے دوبارہ بائی پولر یا ملٹی پولر (جس میں دو یا دو سے زیادہ طاقتیں ہوں اور جو پہلی طاقت کی راہ میں رکاوٹ بن رہی ہوں) کی طرف جا رہی ہے۔ چین امریکہ کے مقابلے میں ایک نئی سپر پاور کے طور پر سامنے آیا ہے جبکہ روس نے بھی صدر پوٹن کی قیادت میں ایک بار پھر خود کو امریکہ کو چیلنج کرنے والی طاقت میں بدل دیا ہے۔ کئی سال سے یہ مقابلہ جاری ہے۔ امریکہ پورا زور لگا رہا ہے کہ اسٹیٹس کو برقرار رہے اور دنیا پر گزشتہ دو دہائیوں کی طرح اس کی اجارہ داری قائم رہے جبکہ چین چاہتا ہے کہ وہ امریکہ کی جگہ لے لے۔ اسی طرح روس بھی چینی بلاک کے ساتھ مل کر دوبارہ امریکہ سے سینگ پھنسانے لگا ہے۔ یوں دنیا ایک اور سرد جنگ میں داخل ہو گئی ہے اور اس کا جو منطقی نتیجہ نکلے گا اس کے نتیجے میں ایک نیا ورلڈ آرڈر جنم لے گا۔

سردست اس سرد جنگ میں ہر فریق ایک قدم آگے بڑھتا ہے اور پھر ایک قدم پیچھے جاتا ہے۔ کبھی انتہائی جارحانہ انداز اپنا لیتا ہے اور کبھی مدافعانہ۔ اس جنگ کے فریقین اپنے لئے اتحادیوں کو بھی تلاش کر رہے ہیں۔ چین بعض ایشوز پر کھل کر امریکہ کو چیلنج کردیتا ہے تو بعض سے متعلق خاموشی اختیار کر لیتا ہے۔ یہی معاملہ امریکہ کا بھی ہے۔ ری پبلکن ہوں یا ڈیموکریٹس، چین کو اپنا نمبر ون ہدف قرار دیتے ہیں لیکن ساتھ ہی ساتھ وہ چین کے ساتھ تجارت بھی کر رہے ہیں۔ روس نے یوکرائن کے معاملے پر بڑا جارحانہ رویہ اپنایا لیکن مشرق وسطیٰ کے قضیے میں امریکہ کے مقابلے میں اس طرح فعال نہیں جس طرح کہ ماضی میں ہوا کرتا تھا۔ اسی طرح امریکہ نے یوکرائن کے معاملے پر اس کی حکومت کو اپنا پراکسی بنا لیا ہے لیکن خود براہ راست افواج نہیں بھیجیں۔ اس نئی اور پیچیدہ سرد........

© Daily Jang