آئی ایم ایف کی چیف کرسٹا لینا جیور جیوا نے کہا ہے کہ پاکستان نے آئی ایم ایف کے ساتھ اپنا موجودہ پروگرام کامیابی سے مکمل کیا ہے تاہم فالو اپ پروگرام کے لیے کچھ مسائل کو حل کرنا ہو گا۔اس سے مفر نہیں کہ معیشت کے استحکام کو برقرار رکھنے کے لیے آئی ایم ایف سے طویل مدتی انتظامات پر بات چیت کرنا نئی حکومت کی مجبوری ہے مگروزرات خزانہ کے مطابق نیا قرض پروگرام موجودہ اسٹینڈ بائی ارجنٹ معاہدے سے بھی زیادہ مشکل شرائط پر مبنی ہو گا۔آئندہ مالی سال کے بجٹ کیلئے آئی ایم ایف وزارت خزانہ کو تجاویز دے گا، جس پر عمل درآمد کرنا ہو گا۔ جن میں بجلی، گیس مزید مہنگی کرنے کے ساتھ مختلف شعبوں کو دی جانے والی سبسڈی کا بتدریج خاتمہ کرنا شامل ہو گا ۔ اس کے علاوہ ٹیکسوں کی مد میں مختلف شعبوں کو دیا جانے والا استثنیٰ بھی ختم کیا جائے گا۔مگر یہ بھی حقیقت کے کہ حالیہ پروگرام کی شرائط پوری کرنے کے لئے جس طرح بجلی گیس اور پٹرول کی قیمتیں بڑھائی گئیں،اس نے عام آدمی کی زندگی اجیر ن کر دی ہے۔ آئی ایم ایف کے مطالبہ پر جو شرح سود مقرر کی گئی ہے اس سے پیداواری شعبہ شدید متاثر ہوا ہے اسی طرح برآمدی شعبہ کو فراہم کی جانے والی سبسڈی کے خاتمہ سے برآمدات کم ہوں گی ۔بہتر ہوگا حکومت نئے پروگرام سے پہلے شرح سود میں کمی کرے اور برآمدی شعبہ کی استعداد کار بڑھانے کے لئے موثر اقدامات کرے تاکہ خود انحصاری کی پالیسی کے باعث آئندہ قرض لینے کی ضرور ہی پیش نہ آئے۔