مجھے ایف سی کالج لاہور کے نیوٹن ہال کی جذباتی وِزٹ کا حال آپ کو حال بتانا ہے۔ مجھے یقین نہیں آ رہا تھا کہ میں اسی نیوٹن ہال کے سامنے کھڑا ہوں جس ہوسٹل میں،مَیں نے کئی عشرے پہلے اپنی بی ایس سی کی پڑھائی کے دو سال گزارے تھے۔ساہیوال سے تعلق رکھنے والا گورنمنٹ کالج لاہور سے ماسٹرز کی ڈگری حاصل کرنے والا نوجوان محمد یوسف پروٹوکول کے لئے میرے ہمراہ تھا۔پرانے ”فارمانائٹس“ یعنی ایف سی کالج کے قدیم طلباء سے تعلقات کے ادارے کے اسسٹنٹ منیجر محمد طلال نے ہمارا استقبال کیا اور نیوٹن ہال اور پرانی لائبریری میں میری دلچسپی کے باعث وزٹ کا اہتمام کیا۔

میرے وقت کے گول مٹول کُرتے شلوار میں ملبوس گول ٹوپی اور سلیپر پہننے والے چوکیدار کی جگہ ایک سمارٹ جین اور پی کیپ پہنے ہوئے گیٹ کیپر گیٹ پر موجود تھا۔ میں نے سب لوگوں سے درخواست کی کہ وہ مجھے موقع دیں آگے چلنے کا اور آپ میرے پیچھے پیچھے آئیں۔ میں اندر داخل ہو کر بائیں ہاتھ کامن روم کے آگے سے گزر کر سیڑھیوں پر پہنچا اور اوپر کی منزل پر صحن کی طرف والی قطار کے پہلے Cubicleپر رُک گیا۔ میں نے بتایا کہ یہ میرا کمرہ تھا۔ طلال صاحب نے دروازے کو کھٹکھٹایا اور ایک بہت ہی شریف اور شرمیلے سے لڑکے نے دروازہ کھولا۔ پہلی نظر میں اس لڑکے سے مجھے کچھ جلن ہوگی کہ یہ کمرہ تومیرا ہے وہ اس پر قابض کیوں ہے؟

© Daily Pakistan (Urdu)