– Denne utbygginga sikrar framtidig vekst og økonomisk utvikling

Det ligg store inntekter for ein kommune å byggja ut og trekkja til seg barnefamiliar, meiner Steinar Haukås.

Du les no ein meiningsartikkel. Han uttrykker skribenten si meining.

Kva vil du bidra med? Send inn her! (max 3000 teikn)

Lesarbrev: Frå 2024 til 2025 er det tatt store steg i Alver aust gjennom oppstart av arbeidet med bygging av ny E39 over Fyllingsnes med topp moderne og trygg gang-/sykkelveg til om lag 200 mill.kr.

Med Statens vegvesen som vegbyggjar er vi garantert gjennomføring og ferdigstilling av dette «bygdeutviklingsprosjektet».

Ved fullført prosjekt, så får bygda ny gang- og sykkelveg på 1,8 km, totalt 3,8 km inkludert det som er på plass i dag.

Og ekstra gledeleg, det vert fysisk skilje mellom gang-/sykkelvegen og bilane på E39, i tillegg vert det også no bygd nytt kryss/avkøyrsle frå E39 og rett inn i dei to nye bustadfelta som er planlagt like ved.

Prosjektet totalt sett er mykje meir enn berre eit bustadfelt og ein ny gang- og sykkelveg.

På Fyllingsnes har politikarane lagt til rette for heile tre nye bustadfelt, med til saman 244 bueiningar.

Lokaliseringa kjenner vi godt, rett frå E39 og inn i bustadfelta, og mjuke trafikantar får ny trygg undergang under E39.

Det ligg store inntekter for ein kommune å byggja ut og trekkja til seg barnefamiliar. Etter det eg kjenner til har Eikangerbygda til saman 275 planlagde bueiningar i bygda, og med erfaringsfaktor 1,63 born pr. bueining, så vert potensial på 448 barn.

Ifølge kommunedirektøren/økonomisjef får kommunen kr 208.000 pr. grunnskuleelev årleg frå staten, som gjev samla potensial på kr 93.mill. x 10 grunnskuleår = kr 930 mill.

Deler ein dette over 30 år får ein kr 31 mill. årleg.

Då er ikkje kommuneskatten tatt med, men ved full utbygging gjev denne om lag kr 12 mill. årleg, eller til saman potensial på 43.mill. i årlege inntekter!

Vi har rett nok venta i over 40 år, men no får vi eit attraktivt bustadområde som barnefamiliar vil setja pris på.

Boligutbygging med «bybane-effekt»

Her kjem trafikksikringa på plass før nokon flyttar inn i eit einaste nytt hus, i naturfint område, men likevel berre 10 min køyring frå regionsenteret.

Varierte bustadalternativ med einebustader, tomanns- og firemannsbustader mv. Og vidare om lag 20 bussavgangar kvar dag, kvar veg. Badeplassar like ved, og kort veg til stort utval av turstiar i skog og mark.

Vidare går Eikangervassdraget gjennom bygda med fleire vatn, sjøen, båtlivet, barne-aktivitetsparken i Vikje med båt, kajakk, zipline mv. akkurat slikt barnefamiliar set pris på i det daglege.

Kommunen vår har ei svært så viktig oppgåve å leggja til rettes for og styra utbygging i kommunen, sjå mogelegheitene, og vera ein bustadvenleg kommune.

Dette er heilt avgjerande for den tida vi no er inne i, fordi kommunen sin økonomi og variert bustadtilbod for barnefamiliar, heng saman.

Og berre for å ha nemnt det: Kjøparane starta å kontakta utbyggjarane i fjor då nyheita om gang-/sykkelvegen kom, dei lurar på kor tid dei kan få kjøpa tomt/hus?

Det er på tide å koma vidare i prosessen.

Kva vil du bidra med? Send inn her! (max 3000 teikn)

Gladnyheit for Eikanger-bygda: Gang- og sykkelvegen vert lyst ut på anbod no

No kjem gang- og sykkelvegen på Fyllingsnes

© Strilen