سکھر سے ڈاکوئوں کی ایک واردات سامنے آئی ہے۔ سستے آٹے کے سٹال سے 45 ہزار روپے نقد اور 22 تھیلے دس دس کلو والے لے اُڑے۔

بہت ہی مسکین اور بزدل قسم کے ڈاکو تھے۔ کل ملا کر ایک لاکھ روپے کی واردات نہیں کی۔ مزید تھیلے بھی سٹور میں پڑے تھے لیکن پکڑے جانے کے ڈر سے 22 تھیلوں پر اکتفا کیا اور بھاگ نکلے۔ اے مسکین بھائیو، سندھ سے باہر آئو، یہاں پنجاب آ کر موجیں اُڑائو ، ایک ایک کروڑ کا ڈاکہ ڈالو، ایک دو آدمیوں کو مار بھی دو، پھر آرام سے اوبر منگوائو اور جہاں جانا ہے چلے جائو، کوئی روکے گا، نہ ٹوکے گا اور یہ اوبر کی مجبوری بھی چند دنوں کی ہے، پھر تو اپنی پجارو ہو گی بلکہ ہوں گی

کیا کیا مچی ہیں یارو، پنجاب میں بہاریں

صبح ڈکیتی، شام ڈکیتی، بیچ دوپہر یا میں بھی ڈکیتی۔ سیاں بھئے کوتوال کا محاورہ سمجھنا ہے تو ترنت پنجاب چلے آئو۔ کچھ مہینے پہلے تک یہ بہارستان پختونخواہ کا صوبہ بنا ہوا تھا، پھر ٹی ٹی پی والے آ گئے اور وہاں کے ڈکیت بھائی بھی پنجاب آبراجے اور اب صوبے میں ہر طرف ڈنکے ہی ڈنکے بج رہے ہیں۔ اور ہاں سنو، زیادہ دیری مت کرنا، کیا پتہ یہاں سرکار بدل جائے۔

_________

چودھری شجاعت کہ پیش گوئیوں کے اعتبار سے آپ بھی مرشد سے کم نہیں، فرماتے ہیں کہ کچھ بھی ہو، پنجاب اسمبلی نہیں ٹوٹے گی نیز یہ کہ الیکشن دور دور تک نظر نہیں آ رہے۔