Technology Ka Tilism, Insan Ka Imtihan Aur Zameen Ka Noha |
ٹیکنالوجی کا طلسم، انسان کا امتحان اور زمین کا نوحہ
ظَهَرَ الُفَسَادُ فِي الُبَرِّ وَالُبَحُرِ بِمَا كَسَبَتُ أَيُدِي النَّاسِ
کائنات کے اس ازلی صحیفے پر اگر کوئی داستان سب سے زیادہ عبرت انگیز، حیرت انگیز اور فکر انگیز ہے تو وہ خود انسان کے عروج و زوال کی داستان ہے۔ وہی ابنِ آدم، جسے ربِ کائنات نے عقل کی روشنی، شعور کی امانت اور اختیار کی عظمت عطا فرمائی، آج اپنی ہی تخلیق کردہ مصنوعی کائنات کے طلسم میں اس طرح محو ہے کہ اسے اپنے اصل مقام، اپنی ذمہ داری اور اپنے گرد پھیلے ہوئے فطری نظام کی نزاکت کا احساس مدھم ہوتا جا رہا ہے۔
یہ وہی انسان ہے جو کبھی پتھر سے چنگاری پیدا کرنے پر مسرور ہوا تھا، پھر بھاپ کی قوت کو مسخر کیا، پھر بجلی کے اسرار سے آشنا ہوا اور اب مصنوعی ذہانت، کوانٹم کمپیوٹنگ اور ڈیجیٹل نیٹ ورکس کی دنیا میں قدم رکھ چکا ہے۔ مگر تاریخِ انسانی کا المیہ یہ ہے کہ ہر نئی قوت کے ساتھ ایک نیا امتحان بھی آتا ہے۔ طاقت جب حکمت کے بغیر ہو تو تعمیر کے بجائے تخریب کا وسیلہ بن جاتی ہے اور علم جب اخلاقی بصیرت سے محروم ہو جائے تو وہ رحمت کے بجائے زحمت کا سبب بن جاتا ہے۔
بلاشبہ انفارمیشن ٹیکنالوجی نے انسانی تہذیب کے افق پر انقلاب برپا کیا ہے۔ اس نے فاصلے مٹا دیے، معلومات کے خزانے عام کر دیے اور دنیا کو ایک ایسے مربوط نظام میں بدل دیا جہاں ایک گوشۂ ارض کی خبر دوسرے گوشے تک لمحوں میں پہنچ جاتی ہے۔ لیکن ہر انقلاب کی طرح اس انقلاب کا بھی ایک روشن پہلو ہے اور ایک تاریک سایہ۔ جس ہاتھ میں یہ علم کا چراغ ہے، اسی ہاتھ میں اگر بے اعتدالی ہو تو یہی روشنی آنکھوں کو خیرہ بھی کر سکتی ہے۔
آج انسان نے ایک ایسی برقی دنیا آباد کر لی ہے جہاں اسکرینیں اس کے شب و روز کی نئی مصروفیت بن گئی ہیں۔ کبھی گھر محبت، مکالمے اور انسانی قربت کے مراکز ہوا کرتے تھے، آج انہی گھروں میں خاموش آلات کی نیلی روشنی نے گفتگو کے چراغ مدھم کر دیے ہیں۔ انسان ہزاروں میل دور بیٹھے افراد سے رابطہ رکھتا ہے، مگر کبھی کبھی اپنے ہی قریب ترین رشتوں کے احساسات سے بے خبر ہو جاتا ہے۔ یہ عصرِ حاضر کا وہ عجیب تضاد ہے کہ ذرائعِ اتصال کی کثرت کے باوجود انسان داخلی تنہائی کا شکار ہوتا جا رہا ہے۔
سوشل میڈیا کی بے انتہا گردش، مختصر اور فوری محرکات کی عادت اور مسلسل اطلاعاتی یلغار نے انسانی ذہن کی اس گہرائی کو متاثر کیا ہے جو کبھی........