جناب شفیق الرحمن ایک کرم ہم پر یہ کرتے تھے کہ طنز و مزاح پر مشتمل انگریزی کتابیں اور رسالے ہمیں گاہے گاہے ایک وزنی پیکٹ کی صورت میں ارسال کرتے رہتے تھے، چنانچہ ہمارے پاس’’ پنچ‘‘کے پرانے پر چوں کا ڈھیر اور کتابوں کی ڈھیریاں لگ گئیں ۔ گزشتہ ہفتے ان میں ہمیں دو کتابیں Two Thousand Insultsاور Two Thousand More Insults نظر آئیں ۔ ہم نے ان کتابوں کے اُردو نام ہتک آمیز مواد اور مزید ہتک آمیز مواد تجویز کیے ہیں۔ یہ کتابیں مختلف النوع افراد کے بارے میں دو دو ہزار کٹیلےجملوں پر مشتمل ہیں ۔ ہم نے قارئین کی دلچسپی کیلئے اس ہتک آمیز مواد کے کچھ حصے ترجمہ کیے ہیں اور انہیں اس کالم میں پورے دھڑلے کے ساتھ درج کر رہے ہیں کہ یہ وہ ہتک آمیز مواد ہے جو سنسر سے منظور شدہ ہے۔ اس ہتک آمیز مواد کا کچھ حصہ ذیل میں پیش خدمت ہے۔

وہ دانتوں کے علاج کیلئے ہمیشہ کسی خاتون دندان ساز کے پاس جاتا ہے دراصل اسے اس امر سے ریلیف ملتا ہے کہ خاتون خانہ کے برعکس یہ خاتون اسے منہ بند رکھنے کی بجائے منہ کھولنے کیلئے کہتی ہے۔

واضح اعداد و شمار کے باوجود وہ یہ بات تسلیم نہیں کرتا کہ غیر شادی شدہ کے مقابلے میں شادی شدہ افراد کی عمر طویل ہوتی ہے۔ اس کا کہنا ہے کہ شادی شدہ افراد کی عمر طویل نہیں ہوتی بلکہ انہیں صرف محسوس ہوتی ہے۔ان کی شادی کو پانچ برس گزر گئے ہیں مگر خاتون خانہ نے شوہر کی ماہانہ آمدنی شوہر سے ابھی تک چھپا رکھی ہے۔

کئی دفعہ ایسا بھی ہوتا ہے کہ وہ اپنے شوہر کے سامنے گھٹنوں کے بل جھک جاتی ہے اور کہتی ہے کہ اب چار پائی کے نیچے سے نکل آؤ۔جھگڑے کی صورت میں وہ تلخی ختم کرنے کیلئے جلد ہی سمجھوتے پر پہنچ جاتے ہیں یعنی شوہر خیر سگالی کے طور پراپنی غلطی تسلیم کر لیتا ہے اور وہ خیر سگالی کے طور پر اسے معاف کر دیتی ہے۔

اس کا ایک جڑواں بھائی ہے جو ہو بہو اس کے مشابہ ہے۔ ایک ہی روز پیدا ہونے والے اس بھائی بہن میں ایک معمولی سا فرق ہے اور وہ یہ کہ بھائی 49 سال کا ہے جبکہ وہ ابھی 39 سال ہی کی ہے۔ اس کا خاوند ڈپلومیٹ ہے چنانچہ وہ اپنی بیوی کی سالگرہ یا د رکھتا ہے، یہ بھول جاتا ہے کہ کتنی ویں سالگرہ ہے؟اسکی زندگی کے بہترین دس سال وہ تھے جو اس نے 29 اور 30برس کی عمر کے دوران گزارے۔ اسے وہ لوگ برے نہیں لگتے جو اس سے تعلقات کا ڈھونڈورا پیٹ دیتے ہیں، کیونکہ وہ جس عمر میں ہے اسے اس قسم کی پبلسٹی کی شدید ضرورت ہے۔

اس کا خیال ہے کہ اس کے چہرے سے شعاعیں پھوٹتی ہیں چنانچہ جب آپ اسے دیکھنے لگتے ہیں ، وہ دھوپ کی عینک آپ کے ہاتھ میں تھما دیتا ہے۔اس کا قد پانچ چھ انچ اور اس کی انا چھ فٹ پانچ انچ ہے۔جب آپ اس کی ذہانت کی تعریف کریں گے تو وہ انکساری سے کہے گا میں شرط لگانے کو تیار ہوں کہ تم یہ بات ہر اس شخص کو کہتے ہو جو ذہین ہے۔اپنی گزشتہ سالگرہ پر اس نے اپنے والدین کو مبارک باد کا تار بھیجا !اس کے بارے میں گفتگو کرتے ہوئے محتاط رہیں، کیونکہ آپ اس شخص کے بارے میں گفتگو کر رہے ہوتے ہیں جس سے وہ محبت کرتا ہے۔

وہ اتنا بور ہے کہ ایٹمی حملے........

© Daily Jang