Einar Ådland hadde eit sterkt engasjement, blant anna knytt til målsaka og motstanden mot EU |
Einar Ådland hadde eit sterkt engasjement, blant anna knytt til målsaka og motstanden mot EU
Journalisten, informasjons- og organisasjonsmannen Einar Ådland, Askøy, er død, 84 år gammal. Han var fødd og oppvaksen på Karmøy.
Ådland gjekk på Voss Landsgymnas. Etterpå studerte han ved Universitetet i Oslo og blei cand. mag med faga norsk, engelsk og historie.
I studietida var han ferievikar som journalist i Haugesunds Avis, Nationen, Dagbladet, NRK og Dag og Tid.
Faste stillingar som journalist hadde Ådland i Senterpartiets pressekontor og Nationen før han blei redaktør i Dagbladet Rogaland i Stavanger (1974-1976).
Resten av yrkeslivet var Ådland informasjonsmedarbeidar og forskingsformidlar ved Universitetet i Bergen og Universitetsmuseet. I fleire år redigerte han tidsskriftet Museumsnytt. Eitt år hadde han permisjon frå UiB og var informasjonssjef ved Landbrukshøgskulen på Ås.
Einar Ådland hadde eit sterkt engasjement, bl a knytt til målsaka og motstanden mot EU.
Han hadde mange verv i målrørsla. I studietida redigerte han Apropos, avisa til Studentmållaget i Oslo. I to år var han medlem av styret og arbeidsutvalet i Noregs Mållag. Eitt år var han sekretær i Noregs Mållag. Frå 1974 til 1978 var han leiar i Kringkastingsringen. Etter at han fekk seg arbeid i Bergen og busette seg på Askøy, var han bl a leiar i Hordaland Mållag. Han var i fleire år leiar i Askøy Mållag og ansvarleg for juleheftet Jul på Askøy.
Han var leiar i Askøy Nei til EU og Askøy Venstre. Han sat i kommunestyret i ein periode.
Ådland var kunnskapsrik og språkmektig. Hans interesse-felt spente vidt, frå bærdyrking til amerikansk bilindustri. Han var eit lesande menneske med bøker i så godt som alle rom i heimen på Askøy.
Ved inngangen til 2026 orka han ikkje lenger å gi seg i kast med fleire bøker. Då skjøna familien at det gjekk mot slutten for Einar. Kona Kirsten Solheim og sønene Vemund og Øyvind lever att etter han. Dei minnest ein ektemake og far i kjærleik. Det var det finaste ordet Einar visste om, sa han ein gong i eit intervju.