പാലാ ബസ്സ്റ്റാന്റിലെത്തുമ്പോള്‍ മാണി മാപ്പിളയപ്പൂപ്പന്‍ ചോദിച്ചു 'രാജന്‍ സാറു തെള്ളിയാമറ്റത്തിനായിരിയ്ക്കുമല്ലോ'. അച്ഛന്‍ മറുപടി പറഞ്ഞു 'അതെ'. ദാ കിഴക്കു വശത്തു മങ്കൊമ്പു ബസ്സു റെഡിയാ. മാണി മാപ്പിളയപ്പൂപ്പന്‍ അവരെ ബസ്സിനടുത്തേക്കു നയിച്ചു. റോഡ് ലൈന്‍സ് ബസ്സില്‍ കൊച്ചു സന്ധ്യയേയും കൊണ്ട് അച്ഛനുമമ്മയും കയറുമ്പോള്‍ നല്ല തിരക്ക്. ഡ്രൈവര്‍ ഇരിയ്ക്കുന്നതിനു നേരെ എതിര്‍വശത്ത് ഒരു പെട്ടിയില്‍ പച്ച റെക്‌സിന്‍ സീറ്റ് പിടിപ്പിച്ചിട്ടുണ്ട്. അവിടേയ്ക്കു കൈചൂണ്ടി കണ്ടക്ടര്‍ ഉത്തരവിട്ടു. ആ കുട്ടിയേയും കൊണ്ട് അമ്മ അവിടെയിരിയ്ക്കൂ. അമ്മ അവിടെ ഇരുന്നു. മോള്‍ മടിയിലും. നരച്ച മുടിയും പ്രസന്ന മുഖവുമുള്ള ഡ്രൈവര്‍ മോളെ നോക്കിച്ചിരിച്ചു. മോളും ചിരിച്ചു. ഡ്രൈവര്‍ കുശലം ചോദിച്ചു. 'മോളെങ്ങോട്ടാ?' 'മോള് അപ്പൂപ്പന്റേം അമ്മൂേമ്മടേം അടുത്ത് പോവാ'.ഡ്രൈവര്‍ അമ്മയോട് 'പരമേശ്വരന്‍ പിള്ളേച്ചന്റെ മോളല്ലേ?'
അമ്മ: 'അതെ'.

ഡ്രൈവര്‍ പാലാ ബസ്സ്റ്റാന്‍ഡില്‍ വണ്ടി സ്റ്റാര്‍ട്ടാക്കി. മാണിമാപ്പിളയപ്പൂപ്പന്‍ ഉറക്കെ വിളിച്ചു പറഞ്ഞു 'മങ്കൊമ്പു, മങ്കൊമ്പു, മങ്കൊമ്പ്, പനയ്ക്കപ്പാലം, പ്ലാശനാല്‍ കളത്തുക്കടവു, മൂന്നിലവു, മങ്കൊമ്പു' (ബസ്സ്റ്റാന്‍ഡില്‍ വിളിച്ചു ചൊല്ലി ആളെ ബസ്സുകളിലേയ്ക്ക് ആകര്‍ഷിക്കുന്ന പണിയാണദ്ദേഹത്തിന്. പാലായിലെ വീടിന്റെ അയല്‍വാസിയും). ബസ് ഒന്നനങ്ങി സ്പീഡു പിടിച്ച് അല്പം കഴിഞ്ഞപ്പോഴേക്കും കൊച്ചു സന്ധ്യയുടെ അടുത്തിരുന്ന ചട്ടയും മുണ്ടും ധരിച്ച് കാതില്‍ വലിയ തോടയിട്ടാട്ടി, തോളില്‍ കാവി നിറമുള്ള കവിണി ശരിയാക്കിക്കൊണ്ടിരുന്ന സ്ത്രീ വിളിച്ചു പറഞ്ഞു, ആളിറങ്ങണം. കണ്ടക്ടര്‍ അതു കേട്ടു ബെല്ലടിച്ചു. 'ക്ണീം ക്ണീം. . . ' ഒരു ചരടിന്റെ അറ്റത്താണാ ബെല്ല്. ബസ്സിലെവിടെ നിന്നും ആ ചരടില്‍ പിടിച്ചു കണ്ടക്ടര്‍ക്കു ബെല്ലടിക്കാം. ഒപ്പം ഉറക്കെ വിളിച്ചു പറഞ്ഞു, 'മൂന്നാനി ഇറങ്ങാനുള്ളവരൊക്കെ ഇറങ്ങിക്കോണം'. തന്റെ കാലന്‍ കുടയും കുത്തി ചേടത്തി തന്റെ തോടയാട്ടി, മുറുക്കാന്‍ നിറഞ്ഞ വായ മുറുക്കിപ്പൂട്ടി തലയാട്ടി മോളോടു യാത്ര പറഞ്ഞ് ഇറങ്ങാനുള്ള തത്രപ്പാടിലേയ്ക്കു പ്രവേശിച്ചു. കൊച്ചു സന്ധ്യയ്ക്കു ചേടത്തിയുടെ തോടയാട്ടം നോക്കിയിരിയ്ക്കാനുള്ള അവസരം നഷ്ടപ്പെട്ടതില്‍ അല്പം നിരാശ പക്ഷേ പുതിയ കൗതുകങ്ങളിലേയ്ക്കു പെട്ടെന്നു ശ്രദ്ധ തിരിഞ്ഞു. ഡ്രൈവര്‍ ഇരിയ്ക്കുന്ന സീറ്റിന് അടുത്തായി നടുവില്‍ ഒരു ഉയര്‍ന്ന പെട്ടിപോലുള്ള ഭാഗമുണ്ട്. പിന്നെ ബസിന്റെ ഗിയര്‍. അതില്‍ പിടിച്ച് ഡ്രൈവര്‍ ആയാസപ്പെടുമ്പോഴാണ് സ്പീഡു കൂടുന്നതും കുറയുന്നതും. കാണാന്‍ നല്ല കൗതുകം. ബോട്ടിലെ യാത്ര പോലെ അല്ല, ബസ്സു യാത്ര വളരെ രസകരമായി കൊച്ചു സന്ധ്യയ്ക്കു തോന്നി.

ഇറങ്ങാനുള്ള തത്രപ്പാടില്‍ താഴെ വീണു ചിതറിയ പൊതിച്ചോറ്, ശ്വാസം മുട്ടുന്നേ എന്ന ഒരു കുട്ടിയുടെ കരച്ചില്‍ അങ്ങനെ അനുനിമിഷം സംഭവിച്ചുകൊണ്ടിരിക്കുന്ന കൗതുകങ്ങള്‍ക്കു നടുവില്‍ അതാ ബസ്സ് തെള്ളിയമറ്റത്തെത്തി. അമ്മ ഇറങ്ങാനായി എഴുന്നേറ്റു. കൊച്ചു സന്ധ്യ ഡ്രൈവര്‍ക്കു ടാറ്റാ പറഞ്ഞു. ബസ്സിന്റെ ചവിട്ടുപടി ഇറങ്ങുന്നതിനു മുന്‍പു തന്നെ അപ്പൂപ്പന്‍ മോളെ എടുത്തു കഴിഞ്ഞു. അപ്പൂപ്പന്റെ തോളിലിരുന്നു വീട്ടിലേയ്ക്കു പോകാന്‍ തുടങ്ങുമ്പോഴേയ്ക്കും 'കാര്‍ത്തികച്ചേച്ചി എപ്പഴെത്തി' 'പിള്ളേച്ചന്റെ കൊച്ചുമോളെത്തിയില്ലേ' തുടങ്ങിയ ഒട്ടേറെ കുശലം പറച്ചിലുകള്‍. ഒരു ഒറ്റമുണ്ട് മാത്രമാണു അപ്പൂപ്പന്റെ വേഷം. വീട്ടിലേക്കു പോകാനായുള്ള കുറുക്കുവഴി ഒരു തോടു കടന്നാണ്. തോട്ടിലെത്തുമ്പോള്‍ മോളുടെ ചിറ്റ തോട്ടില്‍ കുളിയ്ക്കാനായി കിടത്തിയിരിയ്ക്കുന്ന ആന ശ്രീകുമാരിയുടെ പുറത്തിരിയ്ക്കയാണ്. മോളു വന്നേ എന്നു പറഞ്ഞ് ചിറ്റ ആനപ്പുറത്തുന്നു ചാടിയിറങ്ങി. 'മോള്‍ക്കും ആനപ്പുറത്തു കയറണം', കൊച്ചു സന്ധ്യ ചിണുങ്ങി അയ്യോ മോളിപ്പം മടുത്തില്ലേ, ഇപ്പോ വീട്ടിലമ്മൂമ്മ നോക്കിയിരിയ്ക്കയല്ലേ, നമുക്കു നാളെ ആനപ്പുറത്തു കയറാം. ചിറ്റ മോളേയും കൂട്ടി മുന്‍പില്‍ ഓടി. കയ്യാലയുടെ കുത്തുകല്ലു കയറാന്‍ ചിറ്റ മോളെ സഹായിച്ചു. അമ്മേ അവരെത്തി, എന്നുറക്കെപ്പറഞ്ഞു കൊണ്ടു ചിറ്റ മുന്‍പില്‍. വീട്ടില്‍ നിന്നിറങ്ങി വരുന്ന അമ്മൂമ്മയെ മോളു കെട്ടിപ്പിടിയ്ക്കുമ്പോഴേയ്ക്കും അമ്മൂമ്മ കുഞ്ഞിനെ വാരി എടുത്തു. വാലാട്ടിക്കൊണ്ട് ടിപ്പു എന്ന പട്ടിയും. വാലുപൊക്കി മ്യാവൂ എന്നു കരഞ്ഞുകൊണ്ട് 'കള്ളിച്ചക്കി' എന്ന പൂച്ചയും. വീടാകെ ആഘോഷമാക്കിക്കൊണ്ട് പറമ്പില്‍ പണിതുകൊണ്ടിരുന്ന പണിക്കാരും ഓടി വന്നു, കുശലം ചോദിയ്ക്കാന്‍. അപ്പോഴേയ്ക്കും അമ്മൂമ്മ ഒരു തോര്‍ത്ത് അമ്മയ്ക്കു കൊടുത്തുകൊണ്ട് തോട്ടിപ്പോയി ഒന്നു മുങ്ങിക്കേറിവാ എന്നു പറഞ്ഞു. രാവിലെ കുളിച്ചതാണല്ലോ എന്നായി മോള്‍. ബസ്സില്‍ കയറി യാത്രചെയ്താല്‍ മുങ്ങിക്കുളിക്കണമെന്ന് അമ്മൂമ്മ. ഏതായാലും അമ്മൂമ്മയുടെ 'തിയറി' കോവിഡ് കാലത്ത് എല്ലാവരും അംഗീകരിച്ചതോര്‍ക്കുന്നു.

മുറ്റത്തുകൂടി ഒരു വലിയ കറുത്ത അട്ട ഇഴഞ്ഞുവരുന്നതു കണ്ടു മോളു ചോദിച്ചു. അയ്യോ അതിനെന്തുമാത്രം കാലാ! അമ്മൂമ്മ പറഞ്ഞു, മോളേ അതിനെ തൊടല്ലേ, അത് ഊച്ചും. 'എന്നു വച്ചാല്‍?' 'അതു മോളേ നാറും, കയ്യിലൊക്കെ കറയാകും' ചിറ്റ........

© Mathrubhumi