گورڈن کالج میں طاہر اکرام سے اوّلین ملاقات استادی شاگردی کے رنگ میں ہوئی تھی، لیکن اُنہی معنوں میں جیسے کالج، یونیورسٹی کے طلبہ متعلقہ شعبے کے ہر مدرس کو اپنا استاد سمجھتے ہیں۔ بے مثل انگریزی داں اور چوٹی کے اردو نظم گو آفتاب اقبال شمیم کوہ قاف یعنی پیکنگ یونیورسٹی سے دوبارہ واپس آ کر بی اے کو لازمی انگلش پڑھانے پر مامور ہوگئے۔ تاہم ٹائم ٹیبل کے تحت ولایت پلٹ نوجوان لیکچرر کے ساتھ اُن کی نثر اور پوئٹری اینڈ ڈرامہ کی باہمی تدریس ایک طرح کی ’چلیپائی ضرب‘ تھی۔ ہم دونوں اے اور بی سیکشن کے یکے بعد دیگرے دو دو پیریڈ لے کر نکلتے تو رُخ نیلے درختوں والے پروفیسرز مَیس کی جانب ہی ہوا کرتا۔ پیالی ختم ہونے پر اگلے طویل تر وقفے کی آس لیے آفتاب شمیم اور مَیں بالترتیب بی ایس سی اور انٹرمیڈیٹ پری میڈیکل کو پڑھانے چلے جاتے۔

ایک دن آفتاب صاحب نے انکشاف کیا کہ دسمبر ٹیسٹ میں بی ایس سی کے طلبہ کو مضمون نویسی کے لیے جو موضوعات دیے اُن میں سے ایک پر بہت غیرمعمولی تحریر پڑھنے کو مِلی ہے۔ ”یہ لڑکا چند مہینے پہلے راولپنڈی ڈویژن کی سائیکل ریس میں فرسٹ آیا تھا۔ مَیں نے کہا ہے کہ آپ سے مِلے اور اپنا مضمون بھی دکھائے۔“ عنوان پوچھا تو فرمایا: ”اَین آور وِد مائی سیلف، ایک گھنٹہ اپنے ساتھ۔“ امتحانی پرچے کی ندرت ممتحن کی تخلیقی فِکر کا اظہار تھی۔ چند لمحوں میں جینز جیکٹ میں ملبوس چھوٹے قد کے ایک حرکتی سے نوجوان نے سلام کیا اور تحریر میرے آگے رکھ دی ۔ اپنے روبرو گزرا ہوا ایک گھنٹہ مرگلہ کی پہاڑی پر چڑھ کر شمالی سمت سے سکندر اعظم کی حملہ آور فوج کی منظر کشی سے شروع ہو ا تھا۔ خیال آیا کہ ایسا موضوع آفتاب صاحب ہی سوچ سکتے ہیں اور یہ جواب مضمون بھی ہر کوئی نہیں لکھ سکتا۔

سردیاں موسمِ بہار میں بدلیں........

© Daily Pakistan (Urdu)