پروین سجل سے میری پہلی ملاقات کئی برس پہلے چوپال کے اجلاس میں ہوئی۔ سخت سردی کے دن تھے اور مجھے وہاں ایک افسانہ پڑھنا تھا۔ اُس وقت میں پروین سجل کے صرف نام سے واقف تھی مگر اُن سے ملاقات کا موقع کبھی نہیں ملا تھا۔ اجلاس شروع ہوا تو چند لمحوں میں ایک قدآور شخصیت ہال میں داخل ہوئیں اور ایک طرف بیٹھ گئیں۔ میں باربار اُن کی طرف دیکھتی مجھے نہیں معلوم تھا کہ یہ پروین سجل ہیں۔ اُن کے چہرے پر متانت اور سنجیدگی کا پرتو تھا۔

جیسا کہ اُن کے نام سے ظاہر ہے…… پروین یعنی ”ستاروں کا جھرمٹ“ اور سجل یعنی ”عمدہ“ ستاروں کے جھرمٹ میں رہ کر بڑی عمدگی کے ساتھ اللہ اور اللہ کے رسولؐ کو تلاش کرنے والی……

پروین سجل ممکن، مقال، حطیم اور دیباچہ جیسے منفرد شعری مجموعوں کی پہلے ہی سے تخلیق کار ہیں۔ میں پانچویں کتاب ”آپؐ صلی اللہ علیہ وآلہٖ وسلم“ کی اشاعت پر اُنہیں مبارکباد پیش کرتی ہوں۔ میں معروف شاعرہ پروین سجل کی لکھی اس بابرکت کتاب ”آپؐ صلی اللہ علیہ وآلہٖ وسلم“ پر یہ کالم قارئین کے لیے تحریر کررہی ہوں۔ پروین سجل کی یہ کتاب 248صفحوں کی ایک طویل نعتیہ آزاد نظم ہے اور اسے عمدہ کتاب کہنا غلط نہ ہوگا۔ پروین سجل کی زندگی میں روحانی انقلاب کیسے آیا یقینا یہ اللہ تعالیٰ کی خاص رحمت کے بغیر ممکن نہیں۔

انسانی زندگی میں بہت سے انقلاب آتے ہیں جب آپ کا قلب مجروح ہوتا ہے آپ کی روح میں زلزلے آتے ہیں اور پھر ایک وقت ایسا آتا ہے کہ جب روح........

© Daily Pakistan (Urdu)