جس طرح سائنس آج تک اس سوال کا جواب تلاش نہیں کر سکی کہ پہلے مُرغی آئی تھی یا انڈہ؟اِسی طرح ہم پاکستانی بھی آج تک اِس کشمکش سے نہیں نکل سکے کہ پہلے ”مولوی“ آئے تھے یا ”حلوہ“۔مولوی اور حلوے کا چولی دامن کا ساتھ ہے یہی وجہ ہے کہ ایک مولوی سے کسی نے پوچھا ”مولوی صاحب حلوہ کھاؤ گے؟ تومولوی نے انتہائی برجُستگی سے جواب دیا کہ ”اَنّے(اندھے) کس لئے ہوئے ہیں؟ عام حالات میں تو مولوی حلوہ کھانے سے پہلے ”اندھے“بنتے ہیں، لیکن حلوے کا جلوہ کرتے ہی ان کی آنکھوں کا ”نُور“ واپس آ جاتا ہے۔تاہم لاہور کے اچھرہ بازار میں پیش آنے والا واقع اپنی نوعیت کا یہ پہلا ہے،جب اچھی بھلی آنکھیں رکھنے والے مولوی ”حلوہ“ دیکھ کر ”اندھے“ ہو گئے۔

یوں تو اچھرہ واقع کی کئی جہتیں ہیں،جن میں مشتعل ہجوم کا ایک بے گناہ لڑکی پر دھاوا، پولیس، ڈولفن فورس اور قانون نافذ کرنے والے اداروں کے اعلیٰ افسران اور اہلکاروں کی موجودگی میں سینکڑوں افراد کامتاثرہ خاتون کو جان سے مارنے کی دھمکیاں دینا، اے ایس پی گلبرگ اور متاثرہ خاتون کا پولیس کی گاڑی تک پیچھا کرنا، شہر بانو نقوی کے سامنے ایک مسلح شخص کی خاتون کو گولی مار کر قتل کرنے کی للکار اور سینکڑوں افراد کی یہ نعرے بازی کہ خاتون کی ایک ہی سزا، ”سر تن سے جُدا“۔ واقع کا ”ڈراپ سین“ یہ کہ اس بے گناہ خاتون سے مولویوں اور کیمروں کی موجودگی میں نم آنکھوں اور بھرائی ہوئی آواز میں ایک ایسے گناہ کی معافی منگوانا جو اُس نے کیا ہی نہیں۔