گامے کمہار کے گھر آج پھر کچھ نہیں پکا۔ دو دن پہلے اس کی بیوی رشیداں اچھو کریانے والے سے ایک پاؤ چنے کی دال ادھار لائی تھی پکانے کے لئے۔ جس کو دیتے ہوئے اچھو نے تنبیہہ کی تھی کہ آج آخری بار ادھار دے رہا ہوں۔ پچھلا حساب چکاؤ گی تو نیا کھاتہ شروع ہوگا اب۔ زیادہ ادھار بن گیا توچکاؤ گی کہاں سے۔ ویسے بھی تم لوگوں کے ادھار کے لئے دوکان نہیں کھول رکھی میں نے۔ منتیں کر کے ادھار لی گئی ایک پاؤ دال رشیدہ نے آدھی آدھی کر کے دو دن پکائی۔ پانچ بچے اور دو میاں بیوی کل ملا کے سات افراد، غربت اور ایک گدھے کا ساتھ۔ آج تو گدھا بھی کل سے بھوکا تھا۔ اناج بھی نہیں تھا کہ سوکھی روٹی پکا کر پانی کے ساتھ ہی کھا لی جاتی۔ رات سب نے اگلے دن کی آس پہ کاٹی۔ سورج کی کرنیں ابھی پوری طرح نہیں پھیلی تھیں کہ گامے کمہار نے گدھے کو جوتا اور اپنی گدھا گاڑی لیکر منڈی کی طرف نکل گیا۔ ٹوٹی سڑک کے اونچے نیچے راستوں پر گدھا بہت آہستہ چل رہا تھا، لیکن گامے کو منڈی پہنچنے کی جلدی تھی، تاکہ اس کو گاہک مل جائے لیکن بھوک سے بے حال گدھا اس کا ساتھ دینے سے قاصر تھا۔ منہ سے مغلظات بکتا گاما گدھے کو سوٹے پہ سوٹا مار رہا تھا، تاکہ وہ جلدی چلے لیکن گدھا پھر بھی تیز نہیں چل رہا تھا۔ گامے کی زبان اور ہاتھ تیزی سے چل رہے تھے۔ گدھا جب اڑی کرتا تو گاما اس سے زیادہ اڑیل ہو جاتا۔ پے در پے سوٹے لگنے سے گدھے کو زخم آگئے اور پرانے زخموں سے تازہ خون رسنے لگا۔ بھوک اور زخموں سے بے حال گدھے کی ہمت جواب دے گئی تھی شائد اور اس نے مزید چلنے سے انکار کردیا۔ گاما گدھا گاڑی سے اتر کر اب گدھے کو ہاتھ سے کھینچنے کی کوشش کرنے لگا۔ گاما جو خود بھی رات سے بھوکا تھا، گدھے کی منتوں پہ اتر آیا۔........

© Daily Pakistan (Urdu)