پُرامن اور تشدد سے پاک انتخابات کروانے پر قانون نافذ کرنے والے تمام اداروں کو سبھی دل کی گہرائی سے مبارکباد پیش کرتے ہیں۔اس میں کوئی شک نہیں کہ مسلح افواج نے قانون نافذ کرنے والی ایجنسیوں کے ساتھ مل کر انتخابات کی سکیورٹی میں اہم کردار ادا کیا ہے۔آئی ایس پی آر کے مطابق پاکستانی فوج کے ایک لاکھ 37 ہزار جوانوں، سول آرمڈ فورسز کے لاکھوں، اور کوئیک ریسپانس فورس کے ہزاروں جوانوں نے پرامن انتخابات کو یقینی بنانے میں جو کردار ادا کیا وہ قابل ستائش ہے۔کے پی، بلوچستان میں درجنوں دہشت گرد حملوں کا مقصد الیکشن عمل کو سبوتاز کرنا تھا، ان حملوں میں 10 سکیورٹی اہلکاروں سمیت 12 افراد ہلاک، 39 زخمی ہوئے۔لیکن اس کے باوجود سیکورٹی فورسز نے مو ثر طریقے سے ملک بھر میں امن و سلامتی کو یقینی بنایا یہ اپنے شہریوں کے جمہوری حقوق کے تحفظ کے لیے سکیورٹی ایجنسیوں کے غیر متز لزل عزم کا اظہار ہے۔اس سے قبل پاکستان میں پولنگ کا عمل پرامن طور پر مکمل ہونے کے بعد نگراں حکومت نے قوم کو مبارک باد دی اور اس کے لیے انتظامات کرنے والے اداروں کی کارکردگی کو سراہا ہے۔ نگران وزیر اعظم پاکستان انوارالحق کا کڑ نے بھی ٹویٹ کرتے ہوئے کہا ہے کہ میں بہترین انتظامات کرنے اور صاف شفاف انتخابات کا انعقاد یقینی بنانے پر الیکشن کمیشن، عبوری صوبائی حکومتوں، مسلح افواج، سول فورسز، پولیس، میڈیا اور قانون نافذ کرنے والوں کے کردار کو سراہتا ہوں۔

© Daily Pakistan (Urdu)