عبدالقادر حسن صاحب کا شمار اُن صحافیوں اور کالم نگاروں میں ہوتا ہے جن کو پڑھ کر ہم نے لکھنا،بولنا اور معاملات کو سمجھنا سیکھا، وہ اُن چند صحافیوں میں شمار کیے جا سکتے ہیں جنہوں نے صحافت کے سفر پُر خار میں قدم رکھنے کے بعد پھر ساری زندگی صحافت ہی کو اپنا اوڑھنا بچھونا بنائے رکھا، اُنہوں نے اپنے صحافتی سفر کا آغاز سیاسی رپورٹر کے طور پر کیا اور اُن کا شمار اپنے دور کے بہترین سیاسی رپورٹرز میں ہوتا تھا،یہ ُاس زمانے کی بات ہے جب لاہور کا موچی گیٹ سیاسی جلسوں کا مرکز بنا رہتا تھا اور پورا لاہور سیاست دانوں کی باتیں سننے کے لیے اندرون شہر اْمڈ آتا تھا۔ میں نے بھی اپنے صحافتی سفر کی ابتداء سیاسی رپورٹر کے طور پر کی تھی اِس لئے مجھے اُن کی رپورٹنگ کے بارے میں دوسروں اور خود اُن سے سُن کر اِس کے رموز سیکھنے اور سمجھنے کا بہت موقع ملا،جب بھی موقع ملتا میں اُن سے رپورٹنگ،صحافت اور سیاسی لوگوں کے بارے میں باتیں کرتا اور بہت کچھ سیکھتا۔ قادر حسن صاحب نے ایک دفعہ بتایا کہ جس دور میں وہ رپورٹنگ کرتے تھے،اُس وقت یہ بڑا مشکل کام ہوتا تھا کیونکہ نہ تو ریکارڈنگ کی کوئی سہولت موجود تھی کہ ریکارڈنگ کر لی جاتی اور بعد میں اسے چلا کر خبر یا رپورٹ بنا لی جائے اور نہ ہی ٹیلی فون کے ذریعے سیاست دانوں کی تقریریں دفتر تک پہنچائی جا سکتی تھیں، جو کچھ کرنا ہوتا موقع ہی پر کرنا ہوتا تھا چنانچہ سیاستدانوں کی تقاریر بڑے دھیان سے سننا پڑتیں اور اُن کے نوٹس اُس سے بھی زیادہ دھیان سے مرتب کرنا پڑتے، پھر جب جلسہ ختم ہوتا تو دفتر جا کر اُن نوٹس کی مدد سے خبر تیار کی جاتی تھی جس کے لئے نوٹس کے ساتھ ساتھ یادداشت پر بھی انحصار کرنا پڑتا تھا تاہم انہوں نے بتایا تھا کہ انہوں نے جتنا بھی عرصہ سیاسی رپورٹنگ کی اُس دوران انہیں کسی بھی جانب سے جوابدہی کا سامنا نہیں کرنا........

© Daily Pakistan (Urdu)