طَيّب
تَعا تا نشوف يا إستاذ
شو عامِل سفَاهة أو مَقامْ...
تفضّل تا نعرف ليش عايش
متل بيّاع الكلامْ:
هَيدي بتِلْفَحها قصيدِه
وغيرها كتاب وأغاني
وكلّ ما طلْعِت قبالَك شي مرَا
وحِلوه المَرَا
بتقرَا الأبانا والسّلامْ؟
يَا بْنِ بْرِيتال
وقلعة بعلبِك
شو صاير فيك مَفكوك الّلجامْ ؟
وطايح على بيروت
شايفْها صَبيّة مَقَمّرة
وكل المُدُنْ
كل الشوارع
عم تنقّيلَكْ حَوَاري للغَرامْ ؟
وبتِفتَح القاموس
عا أحلى صُوَر
وبتنفِجِر مِتل السَواقي
شَهوتَك
تا تِسرُق... الأيام والأوهامْ !
وِنسِيتْ يَلّي كنت تعمِلْها أميرة
تْكَبِّرا... وتْزَغِّرا
وِتْيَبِّسا... وِتْزَهّرا
ونْسِيتْ يَلّي تِعمَلَك هيّي جسِر
وتطير مِنْ حَدَّك
وتِتْرِكْلَك على الصفحة... عَلامْ ؟
طَيّب،
فْهِمنا كنت تحت الأربَعين الكافْرَه
وحامل بإيدَك شِعْرَك
تْوَدّيْه
مع سَرب الحَمَامْ
وبَعدين؟
بيسوَى بَقا ترتاح من صَهْلِة فرَس
عم تلعب بْبالَك
مَ بتخلّيك لا تِهْدَا
وَلا تِنْعَس تنامْ !
بْيِسْوَى شِراع البَحْر لمّا ترسِمو
يوصَل عَ مينا
مَ السّفَر أصْلو حَقيقه
والسّفَر نُصّو مَنامْ
بْيِسْوَى تكون شْرِبت مِنْ راس النّبِع
وعْطِشْت تا تشرَب
رجِعت شرِبْت... مِنْ جُوعَك
وْراس النّبع عَلّقلَك وِسامْ
وبَعدين ؟
فَتِّح عَينَك
وْضَوّي جْبينَك
وانتِظِرْ حُكْم الزّمَن
بَعدو الزّمَن إسمو مِتل ما بتَعرفو:
إبن الحَرامْ !